ਲਾਵਾਂ ਮੌਕੇ ਲਹਿੰਗਾ ਪਾਉਣ ‘ਤੇ ਪਾਬੰਦੀ, ਆਨੰਦ ਕਾਰਜ ਨੂੰ ਲੈ ਕੇ ਨਵੇਂ ਨਿਰਦੇਸ਼ ਹੋਏ ਜਾਰੀ

ਤਖ਼ਤ ਸ੍ਰੀ ਹਜ਼ੂਰ ਸਾਹਿਬ ਨਾਂਦੇੜ ਵਿਖੇ ਸਿੱਖ ਮਰਿਆਦਾ ਅਨੁਸਾਰ ਆਨੰਦ ਕਾਰਜ ਸੰਬੰਧੀ ਪੰਜ ਸਿੰਘ ਸਾਹਿਬਾਨ ਨੇ ਨਵੇਂ ਨਿਰਦੇਸ਼ ਜਾਰੀ ਕੀਤੇ ਹਨ। ਇੰਨਾ ਹੀ ਨਹੀਂ ਉਨ੍ਹਾਂ ਨੰਦੇੜ ਸਾਹਿਬ ‘ਚ ਹੋਈ ਮੀਟਿੰਗ ਤੋਂ ਬਾਅਦ ਪਾਸ ਕੀਤੇ ਮਤੇ ਨੂੰ ਸਖ਼ਤੀ ਨਾਲ ਲਾਗੂ ਕਰਨ ਲਈ ਵੀ ਕਿਹਾ ਗਿਆ ਹੈ। ਜੇਕਰ ਇਨ੍ਹਾਂ ਦੀ ਪਾਲਣਾ ਨਾ ਕੀਤੀ ਗਈ ਤਾਂ ਸਖ਼ਤ ਕਾਰਵਾਈ ਕੀਤੀ ਜਾਵੇਗੀ।

ਤੁਹਾਨੂੰ ਦੱਸ ਦਈਏ ਕਿ ਇਹ ਨਿਰਦੇਸ਼ ਵਿਆਹ ਤੇ ਲਾਵਾਂ ਦੌਰਾਨ ਵਧ ਰਹੀ ਵਿਖਾਵਾਂ ਪ੍ਰਥਾ ਨੂੰ ਦੇਖਦੇ ਹੋਏ ਵੀ ਦਿੱਤੇ ਗਏ ਹਨ। ਇਨ੍ਹਾਂ ਵਿੱਚ ਸਭ ਤੋਂ ਅਹਿਮ ਲੜਕੀਆਂ ਨੂੰ ਲਾਵਾਂ ਦੌਰਾਨ ਭਾਰੀ ਲਹਿੰਗੇ ਨਾ ਪਹਿਨਣਨ, ਸਿਰਫ਼ ਸਲਵਾਰ-ਕਮੀਜ਼ ਤੇ ਸਿਰ ‘ਤੇ ਚੁੰਨੀ ਦੇ ਨਾਲ ਆਉਣ ਦੇ ਨਿਰਦੇਸ਼ ਦਿੱਤੇ ਗਏ ਹਨ। ਅਸਲ ਵਿੱਚ ਦੇਖਿਆ ਗਿਆ ਹੈ ਕਿ ‘ਲਾਵਾਂ’ ਸਮੇਂ ਵਿੱਚ ਕੁੜੀਆਂ ਮਹਿੰਗੇ ਅਤੇ ਫੈਸ਼ਨੇਬਲ ਲਹਿੰਗਾ ਅਤੇ ਘੱਗਰੇ ਪਾ ਕੇ ਗੁਰਦੁਆਰਿਆਂ ਵਿੱਚ ਆਉਂਦੀਆਂ ਹਨ। ਉਹ ਕੱਪੜੇ ਇੰਨੇ ਭਾਰੇ ਹਨ ਕਿ ਲਾੜੀ ਦਾ ਤੁਰਨਾ, ਉਠਣਾ, ਬੈਠਣਾ ਅਤੇ ਗੁਰੂ ਮਹਾਰਾਜ ਅੱਗੇ ਮੱਥਾ ਟੇਕਣਾ ਵੀ ਔਖਾ ਹੋ ਜਾਂਦਾ ਹੈ।

ਇਸ ਦੇ ਮੱਦੇਨਜ਼ਰ ਪੰਜਾਂ ਤਖ਼ਤਾਂ ਦੇ ਜਥੇਦਾਰਾਂ ਨੇ ਮਿਲ ਕੇ ਫੈਸਲਾ ਕੀਤਾ ਹੈ ਕਿ ਹੁਣ ਤੋਂ ਲਾੜੀਆਂ ਮਹਿੰਗੇ ਤੇ ਭਾਰੇ ਲਹਿੰਗਾ ਤੇ ਘੱਗਰੇ ਦੀ ਥਾਂ ਕਮੀਜ਼, ਸਲਵਾਰ ਤੇ ਸਿਰ ’ਤੇ ਚੁੰਨੀ ਪਾ ਕੇ ਆਉਣਗੀਆਂ। ਸਿੰਘ ਸਾਹਿਬਾਨ ਨੇ ਕਿਹਾ ਕਿ ਆਨੰਦ ਕਾਰਜ ਸਮੇਂ ਦੁਲਹਨ ‘ਤੇ ਚੁੰਨੀ ਜਾਂ ਫੁੱਲਾਂ ਦੀ ਛਾਂ ਕਰਨ ਦਾ ਰੁਝਾਨ ਸ਼ੁਰੂ ਹੋ ਗਿਆ ਹੈ, ਜੋ ਠੀਕ ਨਹੀਂ ਹੈ।

ਰਿਸ਼ਤੇਦਾਰ ਲਾੜੀ ਨੂੰ ਚੁੰਨੀ ਅਤੇ ਫੁੱਲਾਂ ਦੀ ਛਾਂ ਕਰਕੇ ਗੁਰੂ ਗ੍ਰੰਥ ਸਾਹਿਬ ਅੱਗੇ ਲੈ ਕੇ ਆਉਂਦੇ ਹਨ। ਅਜਿਹੇ ‘ਚ ਹੁਣ ਲਾਵਾਂ ਦੌਰਾਨ ਗੁਰਦੁਆਰਿਆਂ ‘ਚ ਫੁੱਲ ਜਾਂ ਚੁੰਨੀ ਲੈ ਕੇ ਜਾਣ ‘ਤੇ ਪਾਬੰਦੀ ਲਗਾ ਦਿੱਤੀ ਗਈ ਹੈ।